ბაღდათის მუნიციპალიტეტის მერიაში დაწყებული რეორგანიზაციის ფარგლებში გათავისუფლებული თანამშრომლები უკმაყოფილებას გამოთქვამენ.
როგორც ისინი აცხადებენ, ახალი წლიდან მათ ხელშეკრულებები აღარ გაუგრძელეს და სამსახურის გარეშე ათეულობით ადამიანი დარჩა, მათ შორის კულტურის ცენტრის, მოსწავლე-ახალგაზრდული სახლისა და მუსიკალური სკოლების თანამშრომლები.
"გვითხრეს, რომ ხელშეკრულების ვადა ამოგვეწურა და ახალი ხელშეკრულებები აღარ გაგვიფორმეს. 2-3 თვე გაურკვეველ ვითარებაში ვრჩებით, უმრავლესობას საბანკო ვალდებულებები გვაქვს, მიზერული ანაზღურება გვქონდა და ისიც აღარ გვექნება, ასე დააფასეს ჩვენი საქმიანობა",- განაცხადეს ყოფილმა თანამშრომლებმა.
როგორც ბაღდათის მერი არჩილ გოგსაძე აცხადებს, აღნიშნულ პირებს ჰქონდათ ხელშეკრულებები გაფორმებული, რომლებსაც ვადა 31 დეკემბერს ამოეწურა.
მისივე თქმით, რეორგანიზაციის პროცესი მიმდინარეობს, როგორც მუნიციპალიტეტის გამგეობაში, ასევე მერიის ა(ა)იპ-ებში.
"რეორგანიზაცია ყველა ა(ა)იპ- შია გამოცხადებული, მათ შორის მერიაშიც. იყო 7 ა(ა)იპ-იდან დარჩება 5. აქედან გამომდინარე, მოხდება ცვლილება სტრუქტურული ერთეულების და თვითონ თანამშრომლების. მათ ჰქონდათ ხელშეკრულებები, რომელთა ვადა ამოიწურა. შესაბამისად, ხელშეკრულებები გაუფორმდა იმ თანამშრომლებს, ვისი ყოფნაც აუცილებელია, რომ ა(ა)იპ-ის პარალიზება არ მოხდეს. დანარჩენებს ხელშეკრულება არ გაუგრძელდათ. რეორგანიზაციის შემდგომ დაინიშნება ხელმძღვანელი, დამტკიცდება ახალი დებულება, ახალი საშტატო ნუსხა, შემდეგ მოხდება თანამშრომლების ხელახლა აყვანა",- განაცხადა გოგსაძემ.
რაც შეეხება გამგეობაში მიმდინარე რეორგანიზაციას, მერის თქმით, 10 სამსახურიდან ერთი - იურიდიული სამსახური გაუქმდა და ის განყოფილებად გადაკეთდა, შესაბამისად, ბაღდათის გამგეობაში 9 სამსახური დარჩა.