საპარლამენტო კომიტეტებში ფრაქციათა პროპორციული წარმომადგენლობის კვოტები ახლებურად გადანაწილდა

საპროცედურო საკითხთა და წესების კომიტეტმა პარლამენტის კომიტეტებში პროპორციული წარმომადგენლობის ახალი კვოტები განსაზღვრა. კომიტეტებში კვოტების ახალი გადანაწილება უმრავლესობის ფარგლებში ორი ახალი ფრაქციის შექმნამ განაპირობა.

როგორც კომიტეტის თავმჯდომარემ გიორგი კახიანმა განმარტა, უმრავლესობის ფარგლებში შექმნილი ფრაქციებისთვის კვოტები შემდეგნაირად გადანაწილდება - ფრაქცია “ქართული ოცნებას“ ყველა კომიტეტში ორი კვოტა მოაკლდება და ისინი ახლად შექმნილ ფრაქციებს თითო-თითო კვოტით გადაუნაწილდებათ.

საპროცედურო საკითხთა და წესების კომიტეტის გადაწყვეტილება, რომელსაც მხარი ერთხმად დაუჭირეს, პარლამენტის ბიუროს გადაეგზავნება. ამის შემდეგ, ახალ ფრაქციებს კომიტეტებში თავიანთი კანდიდატების წარდგენის საშუალება მიეცემა.