სამთავრობო საათის გამართვის კულტურა საქართველოს პარლამენტში ჯერ კიდევ არ არსებობს, რადგან პარლამენტის წევრები ვერ ხედავენ მის საჭიროებას, - აღნიშნული შეფასება ახალგაზრდა იურისტთა ასოციაციის მონიტორინგის ანგარიშშია გაკეთებული, რომელიც მეცხრე მოწვევის პარლამენტის საქმიანობას შეეხება.

დოკუმენტში ხაზგასმულია, რომ მეცხრე მოწვევის პარლამენტის 2016 წლის საშემოდგომო და 2017 წლის საგაზაფხულო სესიის განმავლობაში სამთავრობო საათი არც ერთხელ არ გამართულა.

„აღნიშნული განპირობებულია იმით, რომ საპარლამენტო უმრავლესობისა და უმცირესობის წარმომადგენლები არ იყენებენ 10-კაციანი ჯგუფისა და ფრაქციის მიერ კითხვის დასმის მექანიზმს. უმცირესობის წარმომადგენლებს ურჩევნიათ მთავრობის წევრები ფრაქციის სხდომაზე დაიბარონ, ხოლო უმრავლესობის წარმომადგენლებისთვის მიზანშეწონილია საკუთარ მთავრობასთან სამუშაო შეხვედრების სხვადასხვა ფორმატის გამოყენება და არაფორმალური კომუნიკაცია“, - ნათქვამია საია-ს ანგარიშში.

პარლამენტის რეგლამენტის თანახმად, სამთავრობო საათი ყოველი თვის პლენარული სხდომის ბოლო კვირის პარასკევს უნდა გაიმართოს.