ბათუმის სასამართლოს გადაწყვეტილება "ქართული ოცნებისთვის" მოულოდნელი არ ყოფილა, - ამის შესახებ აჭარის უმაღლესი საბჭოს ფრაქცია "ქართული ოცნების" დეპუტატმა და ადამიანის უფლებათა კომისიის თავმჯდომარე ცოტნე ანანიძემ ჟურნალიატებთან საუბრისას განაცხადა. მისი თქმით, ბათუმის მოვლენებზე დაკავებული მერაბ ღოღობერიძისა და ირაკლი ჩხვირკიას სასამართლო პროცესების შესახებ ინფორმაცია ჰქონდა და ბრალდების მხარის არგუმენტები ბათუმის მოვლენების ორგანიზების ნაწილში სუსტი იყო.

კითხვაზე, 11-12 მარტს, ბათუმში აქციას ჰყავდა თუ არა ორგანიზატორი, ცოტნე ანანიძე კონკრეტული პასუხის გაცემისგან თავს იკავებს და ამბობს, ეს არის წმინდა სამართლებრივი საქმე.

"სასამართლოს კანონით დაკისრებული უფლება ჰქონდა და იგი არ არის პოლიტიზირებული. ორგანიზების ნაწილში უდანაშაულოდ ცნო სასამართლომ. სასამართლო პროცესებზე ვესწრებოდი და ვიღებდი ინფორმაციას. ბრალდების მხარის არგუმენტები ორგანიზების ნაწილში სუსტი იყო",- აცხადებს ცოტნე ანანიძე.

ბათუმის მოვლენებზე ბრალდებულებს, მერაბ ღოღობერიძეს და ირაკლი ჩხვირკიას სასამართლომ 1,6 წლით თავისუფლების აღკვეთა მიუსაჯა.