”სადახლოზე” და ქუთაისის აეროპორტში ნარკოტიკული და ფსიქოტროპული ნივთიერებების შემცველი მედიკამენტები აღმოაჩინეს, - ამის შესახებ „ინტერპრესნიუსს“ ფინანსთა სამინისტროს შემოსავლების სამსახურიდან აცნობეს.
მათივე ინფორმაციით, 11-13 იანვარს საბაჟო გამშვებ პუნქტებში - ,,სადახლო-საავტომობილო“ და ,,ქუთაისის აეროპორტი“ ნარკოტიკული და ფსიქოტროპული ნივთიერებების შემცველი მედიკამენტების ქვეყნის საზღვარზე უკანონოდ შემოტანის ფაქტები აღიკვეთა.
„ფინანსთა სამინისტროს შემოსავლების სამსახურის მებაჟე ოფიცრებმა ეჭვის საფუძველზე, სომხეთისა და საქართველოს მოქალაქეების ა.გ-სა და თ.ჯ-ს კუთვნილი ბარგის დათვალიერების შედეგად, ნარკოტიკული (32 აბი) და ფსიქოტროპული (6 კაფსულა) ნივთიერებების შემცველი მედიკამენტები აღმოაჩინეს. საქმეთა მასალები შემდგომი რეაგირების მიზნით შინაგან საქმეთა სამინისტროს შესაბამის ერთეულებს გადაეცათ“, - ნათქვამია ინფორმაციაში.