საქართველოს პარლამენტის აგრარულ საკითხთა კომიტეტის თავმჯდომარე ოთარ დანელია და საქართველოს პარლამენტის წევრი მახირ დარზიევი თურქეთის კომპანია „გუბრეთაშის“ წარმომადგენლებს შეხვდნენ.

როგორც „ინტერპრესნიუსს“ პარლამენტიდან აცნობეს, კომპანია თურქეთში სასოფლო-სამეურნეო პრეპარატებს აწარმოებს და მისი წარმომადგენლების სურვილია, რომ ამ მიმართულებით ჩვენს ქვეყანასთანაც დაამყარონ კავშირი.

როგორც შეხვედრაზე აღინიშნა, სტუმრები დაინტერესებული არიან საქართველოში თავიანთი წარმოების განვითარებით, ფერმერებთან საგანმანათლებლო და სადემონსტრაციო პროექტების განხორციელებით. იმედი გამოითქვა, რომ მსგავსი პროექტების განხორციელება საქართველოს სოფლის მეურნეობაში ინვესტიციების მოზიდვას შეუწყობს ხელს.