აშშ-ის სახელმწიფო მდივანმა რექს ტილერსონმა უარყო გავრცელებული ინფორმაცია, თითქოს შეერთებული შტატების თურქეთისა და სირიის საზღვართან შეიარაღებული ძალების ჩამოყალიბებას აპირებდა. „საკითხი, რომელმაც ანკარა გააღიზიანა, არასწორად წარმოაჩინეს, - განაცხადა ტილერსონმა.
„ვითარება სრულიად არასწორად წარმოაჩინეს და აღწერეს. ზოგმა არასწორადაც ილაპარაკა. ჩვენ არ ვაპირებთ სასაზღვრო უსაფრთხოების ძალების შექმნას“, - განაცხადა რექს ტილერსონმა თურქეთის საგარეო საქმეთა მინისტრთან შეხვედრის შემდეგ ვანკუვერში.
როგორც ცნობილია, მას შედეგ, რაც ვაშინგტონმა გამოაცხადა, რომ აპირებდა ახალი სასაზღვრო დაცვის ძალების შექმნას, რომელშიც 30 000 წევრი იქნებოდა, ხოლო აქედან 15 000 „სირიის დემოკრატიული ძალებიდან“ დაკომპლექტდებოდა, თურქეთმა განაცხადა, რომ აუცილებლად შეიჭრებოდა სირიაში, აფრინის რეგიონში, თუკი აშშ ამ განზრახვაზე ხელს არ აიღებდა.