თურქეთი აშშ-სგან სირია-თურქეთის საზღვარზე ყველა შეიარაღების უკან დაბრუნებას მოითხოვს. ამის შესახებ ტელეარხ NTV-სთვის მიცემულ ინტერვიუში თურქეთის იუსტიციის მინისტრმა აბდულჰამით გიულმა განაცხადა.
„თურქეთი არავითარ შემთხვევაში არ დაიწყებს უმოქმედობას თუ მის საზღვრებთან შეიარაღებული ფორმირების შექმნის საფრთხე წარმოიქმნება. აშშ-ს სახელმწიფო მდივნის განცხადება ძალიან მნიშვნელოვანია. შეიარაღება, რომელიც აშშ-მ სირია-თურქეთის საზღვარზე გააგზავნა, უკან უნდა დაბრუნდეს“, - განაცხადა მინისტრმა.
გუშინ აშშ-ს სახელმწიფო მდივანმა რექს ტილერსონმა განაცხადა, რომ აშშ სირია-თურქეთის საზღვრის გასწვრივ უსაფრთხოების ძალებს არ ქმნის.
მანამდე ცნობილი გახდა, რომ ე.წ. სამხედრო კოალიცია, რომელსაც სათავეში აშშ უდგას, აპირებს ახალი სასაზღვრო დაცვის ძალების შექმნას, რომელშიც 30 000 წევრი იქნება. აქედან 15 000 „სირიის დემოკრატიული ძალებიდან“ დაკომპლექტდება.
„სირიის სასაზღვრო დაცვის ძალების“ დანაყოფებს მდინარე ევფრატის მიმდებარედ, ასევე, თურქეთისა და ერაყის საზღვრის გასწვრივ განალაგებენ, რომელთა ამოცანა „ისლამური სახელმწიფოსთვის“ თავისუფალი გადაადგილების შეზღუდვა და უკანონო ტვირთების გადატანაში ხელის შეშლა იქნება.