25-26 იანვარს საქართველოს ოფიციალური ვიზიტით სერბეთის რესპუბლიკის ეროვნული ასამბლეის სპიკერი მაია გოიკოვიჩი ეწვევა. როგორც „ინტერპრესნიუსს“ საქართველოს პარლამენტიდან აცნობეს, ვიზიტის პროგრამის ფარგლებში 25 იანვარს დაგეგმილია სერბეთის რესპუბლიკის ეროვნული ასამბლეის სპიკერის შეხვედრა საქართველოს პარლამენტის თავმჯდომარე ირაკლი კობახიძესთან, რის შემდეგაც პრესისათვის მათი ერთობლივი განცხადება გაკეთდება.

ასევე დაგეგმილია მაია გოიკოვიჩის შეხვედრა საქართველოს კათოლიკოს-პატრიარქთან, ილია მეორესთან.

26 იანვარს საქართველოს მთავრობის ადმინისტრაციაში სერბეთის რესპუბლიკის ეროვნული ასამბლეის სპიკერი მაია გოიკოვიჩი საქართველოს პრემიერ-მინისტრს გიორგი კვირიკაშვილს შეხვდება.

სერბეთის რესპუბლიკის ეროვნული ასამბლეის სპიკერი შეხვდება საქართველოს პრეზიდენტს გიორგი მარგველაშვილს და ვიცე-პრემიერს, საგარეო საქმეთა მინისტრს მიხეილ ჯანელიძეს.

სერბეთის დელეგაცია საქართველოდან 26 იანვარს გაემგზავრება.