მსახიობ გიორგი გიორგანაშვილის მხარდამჭერი საპროტესტო აქცია დასრულდა

რუსთაველის გამზირზე მსახიობ გიორგი გიორგანაშვილის მხარდამჭერი საპროტესტო აქცია დასრულდა. აქციამ მშვიდობიან ვითარებაში ჩაიარა.

როგორც აქციის ორგანიზატორები აცხადებენ, ისინი მომავალი აქციის დროს და ადგილს მოგვიანებით დააანონსებენ. რაც შეეხება დღევანდელ აქციას, მათი თქმით, ყველა ის მოთხოვნა დააფიქსირეს, რაც ნარკოპოლიტიკის ჰუმანურობას შეეხება.

აქციის ორგანიზატორებმა კიდევ ერთხელ გააჟღერეს თავიანთი მოთხოვნები და გააპროტესტეს საქალაქო სასამართლოს მიერ მიღებული გადაწყვეტილება, რომლის თანახმადაც, მსახიობ გიორგი გიორგანაშვილს 8 წლით თავისუფლების აღკვეთა მიესაჯა. აქციის მონაწილეები ასევე მოითხოვენ გადაიხედოს ქვეყანაში არსებული ნარკოპოლიტიკა და გახდეს უფრო ჰუმანური. ასევე, დაისაჯონ ის სამართალდამცველები, რომლებიც შემჩნეული არიან ნარკოტიკული საშუალებების ჩადებაში.