საპარლამენტო უმრავლესობაში შემავალი ახალი ფრაქცია „ქართული ოცნება-ძლიერი ეკონომიკის“ თავმჯდომარე, გოჩა ენუქიძე და ფრაქციის წევრები ოთარ დანელია და ივლიანე წულაია საქართველოში ამერიკის შეერთებული შტატების საელჩოს პოლიტიკურ ოფიცერს ქრისტი მორდჰორს შეხვდნენ.

ამის შესახებ „ინტერპრესნიუსს“ საქართველოს პარლამენტიდან აცნობეს. მათივე ინფორმაციით, შეხვედრაზე მხარეებმა ფრაქცია „ქართული ოცნება-ძლიერი ეკონომიკის“ საქმიანობის შესახებ ისაუბრეს. ხაზი გაესვა ამერიკა-საქართველოს შორის მჭიდრო და პარტნიორულ თანამშრომლობას.

ასევე, განხილული იყო პარლამენტში მიმდინარე პროცესები. მხარეებმა გაცვალეს ხედვები პარლამენტის ინსტიტუციური გაძლიერების თაობაზე. იმსჯელეს ისეთ აქტუალურ საკითხებზე, რომელიც დღეს საზოგადოების ინტერესს წარმოადგენს. მხარეებმა ისაუბრეს პარლამენტისა და ამერიკის საელჩოს შემდგომი თანამშრომლობის შესახებ.