თემირლან მაჩალიკაშვილის საქმის გამოძიებაში კიდევ ერთი დამოუკიდებელი ექსპერტი სავარაუდოდ, დღეიდან ჩაერთვება

თემირლან მაჩალიკაშვილის საქმის გამოძიებაში კიდევ ერთი დამოუკიდებელი ექსპერტი სავარაუდოდ, დღეიდან ჩაერთვება. ამის შესახებ „ინტერპრესნიუსს“ მაჩალიკაშვილების ოჯახის ადვოკატმა მარიამ კუბლაშვილმა განუცხადა. მისი ინფორმაციით, მაია ნიკოლეიშვილთან და ბალისტიკურ ექსპერტთან ერთად ის პანკისის ხეობაში სავარაუდოდ, ხვალ ჩავა და პირველ სამუშაოებს, სპეცოპერაციის ადგილზე ჩაატარებს.

„სავარაუდოდ, ხვალ წავალთ პანკისში დამოუკიდებელ ბალისტიკურ ექსპერტთან და მაია ნიკოლეიშვილთან ერთად. ვიმუშავებთ სახლში და ადგილზე გავაკეთებთ ვიზირებას, მაგრამ კედელი (რომელიც ჩამონგრეულია) ძალიან გვიშლის ხელს. კედელი საჭიროა საერთო სურათის აღსაღდგენად“, - განაცხადა კუბლაშვილმა.

19 წლის თემირლან მაჩალიკაშვილის 26 დეკემბერს პანკისში სპეცოპერაციის დროს თავში დაჭრეს. მას დაახლოებით 2 კვირის განმავლობაში თბილისში მკურნალობდნენ, თუმცა ექიმების მცდელობის მიუხედავად მაჩალიკაშვილი 10 იანვარს გარდაიცვალა.