გერმანიის კანცლერის ანგელა მერკელის „ქრისტიან-დემოკრატიულ პარტიას“, მის შვილობილ „ქრისტიანულ-სოციალურ პარტიასა“ და „სოციალ-დემოკრატიულ პარტიას“ შორის სამთავრობო კოალიციის ჩამოყალიბებაზე ოფიციალური მოლაპარაკებები დღეს დაიწყო, - ამის შესახებ „დოიჩე ველე“ იუწყება.

მოლაპარაკებების მიზანია ე.წ. დიდი კოალიციის ჩამოყალიბება, რის შედეგადაც გერმანიის ორი უმსხვილესი პარტია გაერთიანდება მთავრობის ჩამოსაყალიბებლად.

„ხალხი ჩვენგან მთავრობის ჩამოყალიბებას ელოდება, ამიტომაც ვარ ძალიან ოპტიმისტურად განწყობილი და მონდომებული ამ მოლაპარაკებებში, რათა მივაღწიოთ შედეგს. მჯერა, რომ ამის მიღწევა შესაძლებელია დროის ახლო პერიოდში“ , - განაცხადა მერკელმა.

„ჩინეთისა და აშშ-სგან მომდინარე გამოწვევების გათვალისწინებით, ევროკავშირს სჭირდება ძლიერი, პროევროპული გერმანია“, - აღნიშნა „სოციალ-დემოკრატიულ პარტიის“ ლიდერმა მარტინ შულცმა და დაამატა, რომ სტაბილური მთავრობის ფორმირება არსებითია ქვეყნის წარმატებისთვის.

კოალიციური მთავრობის ჩამოყალიბების პირველი მცდელობა გასული წლის 20 ნოემბერს ჩაიშალა, რადგან პარტია „თავისუფალმა დემოკრატებმა“ და „მწვანეთა პარტიამ“ კოალიციაში გაერთიანებაზე უარი განაცხადეს.

სამთავრობო კოალიციის შექმნისათვის გადამწყვეტი იყო „სოციალ-დემოკრატიული პარტიის“ პოზიცია, რომელმაც 22 იანვარს პარტიის რიგგარაშე ყრილობაზე მხარი დაუჭირა ოფიციალური მოლაპარაკებების წარმოებას აღნიშნული წინადადების შესახებ.