პარლამენტის თავმჯდომარე ირაკლი კობახიძე აცხადებს, რომ საზოგადოებრივი მაუწყებლის საბიუჯეტო დაფინანსება შესაძლოა გადასახედი იყოს და ამ თემაზე სამომავლო დისკუსიის გაგრძელების მზადყოფნას გამოთქვამს.
როგორც კობახიძემ მედიაორგანიზაციებთან შეხვედრაზე განაცხადა, არავის დაუთვლია, რამდენი სჭირდება საზოგადოებრივ მაუწყებელს. პარლამენტის სპიკერის თქმით, ასეთი შეფასება უნდა გაკეთდეს და სამომავლოდ, თუ საჭირო იქნება დისკუსია, ის მზადყოფნას გამოთქვამს განხილვისთვის დაადგინონ, ჭარბი რესურსი აქვს მინიჭებული თუ არა.
"43 მილიონი 1,5%-იან რეიტინგში ნამდვილად არის ბევრი",- აღნიშნა კობახიძემ.
მედიაორგანიზაციების წარმომადგენლებმა პარლამენტის თავმჯდომარეს მოუწოდეს, ასეთ შემთხვევაში ჯერ საზოგადოებრივი მაუწყებლის საბიუჯეტო დაფინანსება გადაიხედოს და დაყვანილ იქნას ევროპული ქვეყნების სტანდარტებამდე და მხოლოდ ამის შემდეგ მიეცეს მას კომერციული რეკლამის განთავსების საშუალება, რათა გარანტირებული მაღალი შემოსავლების გამო რეკლამაზე დემპინგური ფასი არ დააწესოს.