თბილისის საკრებულოს სხდომაზე ვერ მივიღეთ პასუხები კითხვებზე, თუ რა კრიტერიუმებით უნდა მოხდეს ტაქსების რეგისტრაცია და რა პირობებს უნდა აკმაყოფილებდნენ ტაქსის მძღოლები, - ამის შესახებ საკრებულოს სხდომის დასრულების შემდეგ ფრაქცია „ევროპული საქართველოს“ წევრმა დავით ჟღენტმა ჟურნალისტებს განუცხადა.
„სამწუხაროდ, ქალაქის მთავრობამ დააყენა საკითხი, რომ ტაქსის მძღოლებთან დაკავშირებით გარკვეული რეგულაცია უნდა გავრცელდეს. დღევანდელ სხდომაზე ჩვენ დავსვით კითხვები, თუმცა კონკრეტული პასუხები ვერ მივიღეთ, თუ რა კრიტერიუმებით უნდა მოხდეს შერჩევა და რა პირობებს უნდა აკმაყოფილებდნენ ტაქსის მძღოლები. მათგან მოვისმინეთ, სამწუხაროდ, განცხადებები იმის შესახებ, რომ ზოგიერთ მძღოლს თმა აქვს დასავარცხნი ან ალკოჰოლის ზემოქმედების ქვეშ იმყოფება. ჩვენ ვთვლით, რომ მერიამ, პირველ რიგში, უნდა იზრუნოს ახალი ავტობუსების შემოყვანაზე, პარკირების სისტემაზე და იმ ადამიანების დასაქმებაზე, რომლებიც ტაქსის მძღოლობით ირჩენენ თავს“, - განაცხადა დავით ჟღენტმა.