თურქეთის მთავრობის სპიკერი - ჩვენი ქურთი ძმები არ არიან თურქეთის ოპერაცია „ზეთისხილის ტოტის“ სამიზნეები

სირიის ჩრდილო-დასავლეთში ჩვენი ქურთი ძმები არ არიან თურქეთის ოპერაცია „ზეთისხილის ტოტის“ სამიზნეები, - ამის შესახებ დღეს თურქეთის პრემიერ-მინისტრის მოადგილემ და მთავრობის სპიკერმა ბექირ ბოზდაღმა განაცხადა.

მისი თქმით, თურქეთი ყოველთვის უჭერდა მხარს ქურთებს სირიასა და ერაყში, როცა მათ ჩაგვრა ემუქრებოდათ, თურქეთი გააგრძელებს ქურთებისა და სხვა ეთნიკური ჯგუფების მხარდაჭერას, ვისაც ჩაგვრა და სისასტიკე ემუქრება.

ბოზდაღის თქმით, ოპერაციის მიზანი ქურთული დაჯგუფებების განადგურებაა რეგიონში, ასევე სამოქალაქო პირებისთვის უსაფრთხოების შექმნა, რომელთა შორის არიან: თურქმენები, არაბები, ქურთები და იქ მცხოვრები სხვა ეთნიკური ჯგუფები.

მან დაამატა, რომ ოპერაცია მიმდინარეობს ისე, რომ სირიის სახელმწიფოს ტერიტორიული ერთიანობა, სუვერენულობა და პოლიტიკური ერთობა დაფასებულია.

„თურქეთი ოპერაციის წარმატებით დამთავრებისთანავე გამოიყვანს ჯარებს რეგიონიდან“, - აღნიშნა ბოზდაღმა და დაამატა, რომ ოპერაცია აფრინში არა არჩევანი, არამედ აუცილებლობაა.

„ტერორისტული არმიის ფორმირება ღია საფრთხეა თურქეთისა და სირიისთვის“ , - აღნიშნა ბოზდაღმა.

ოპერაცია „ზეთისხილის ტოტი“ თურქეთმა 20 იანვარს დაიწყო. როგორც თურქეთული სააგენტო „ანადოლუ“ იტყობინება, თურქეთის გენშტაბის მონაცემების ოპერაციის დაწყებიდან დღემდე ქურთული დაჯგუფებებისა და „ისლამური სახელმწიფოს“ 597 წევრია ლიკვიდირებული.