თბილისის მერია შპს „ყვარელრემმშენის“ მიერ მეტროსადგურ "ახმეტელის თეატრში" ჩატარებული სარეაბილიტაციო სამუშაოების ხარისხის შემოწმებას იწყებს

თბილისის მერია, მეტროსადგურ "ახმეტელის თეატრის" შემოწმებას იწყებს, რომელშიც სარეაბილიტაციო სამუშაოები კომპანია შპს „ყვარელრემმშენმა“ ჩაატარა. ეს არის კომპანია, რომელმაც შესაბამისი სამუშაოები მეტროსადგურ „ვარკეთილშიც“ აწარმოა, სადაც დღეს ჭერი ჩამოინგრა და 11 ადამიანი დაშავდა.

როგორც ჟურნალისტებს თბილისის მერმა კახა კალაძემ განუცხადა, მეტროსადგურ "ახმეტელის თეატრის" შემოწმება დღესვე დაიწყება.

„დღესვე დაიწყება გადამოწმება, თუ როგორ არის სამუშაოები ჩატარებული, რათა ყველა უბედურება იყოს თავიდან აცილებული“, - განაცხადა კალაძემ.

შეგახსენებთ, რომ მეტროსადგურ "ვარკეთილს" რეაბილიტაცია ცოტა ხნის წინ ჩაუტარდა. კერძოდ, "ვარკეთილის" სადგურის სარემონტო სამუშაოები 2016 წლის ბოლოს დაიწყო და 2017 წლის სექტემბერში დასრულდა.