მეტროსადგურები სერიოზულ რეაბილიტაციას საჭიროებს და ამაზე მუშაობა უკვე დაწყებულია, - ამის შესახებ პარლამენტის თავმჯდომარე ირაკლი კობახიძემ ჟურნალისტებს მეტროსადგურ "ვარკეთილში" ჭერის ჩამონგრევის ფაქტის კომენტირებისას განუცხადა.

ირაკლი კობახიძის თქმით, მომხდარზე დეტალურ ინფორმაციას არ ფლობს, თუმცა ზოგადად სამუშაოები გასატარებელია.

"როდესაც საარჩევნო შტაბში თბილისის წინასაარჩევნო პროგრამაზე ვმუშაობდით, იქ ერთ-ერთ მთავარ პრობლემად გამოიკვეთა ის მდგომარეობა, რომელიც შექმნილია მეტროში. მეტროსადგურები სერიოზულ რეაბილიტაციას საჭიროებს და ამაზე მუშაობა უკვე დაწყებულია. ეს მოითხოვს სერიოზულ რესურსებს. ამ ყველაფერში მხარდაჭერას გაგვიწევენ ჩვენი საერთაშორისო პარტნიორები, მოლაპარაკებები უკვე დაწყებულია და გაგრძელდება მეტროს რეაბილიტაციის პროექტი",- განაცხადა კობახიძემ.

რაც შეეხება უსაფრთხოების ნორმების გამკაცრებას, კობახიძის თქმით, რისი გაკეთებაც საჭიროა კანონმდებლობის დონეზე, ყველაფერი გაკეთდება პარლამენტის მიერ, დანარჩენი კი კონკრეტული პროექტების და პროგრამების საქმეა, რომლებიც, ასევე, უსაფრთხოების სტანდარტების დაცვით უნდა განხორციელდეს.