გაერო-ში აშშ-ს ელჩი ნიკი ჰეილი აშშ-ს პრეზიდენტის დონალდ ტრამპის კონგრესში ყოველწლიურ სიტყვით გამოსვლას გამოეხმაურა და აღნიშნა, რომ „ამერიკისთვის დიდი დღე დადგა“.

„დღეს პრეზიდენტმა გარკვევით განაცხადა, რომ ამერიკა კვლავ ლიდერია. ჩვენ ვიცით, რომ ჩვენი ქვეყანა გაცილებით ძლიერია მაშინ, როდესაც მკაფიო გადაწყვეტილებებს ვიღებთ, რაც ამერიკელების უსაფრთხოებას უზრუნველყოფს პირველ რიგში“, - განაცხადა ნიკი ჰეილიმ.

გაერო-ში აშშ-ს ელჩმა ასევე აღნიშნა, რომ „პირველად დიდი ხნის განმავლობაში, ამერიკის მეგობრებმა იციან, რომ მათ შეუძლიათ აშშ-ს იმედი ჰქონდეთ, ხოლო მტრებმა კი იციან, რომ აშშ მათ გასაქანს არ მისცემს“.

„ჩვენ მტკიცედ ვეწინააღმდეგებით სახიფათო და დესტაბილიზაციის გამომწვევ რეჟიმებს, რომლებიც არღვევენ საერთაშორისო ვალდებულებებს. ჩვენ ასევე ვეწინააღმდეგებით ტერორისტულ ორგანიზაციებს, როგორიც არის „ისლამური სახელმწიფო“, რომლებიც კარგავენ თავიანთ პოზიციებს და გაქცევაზე არიან“, - აღნიშნა ნიკი ჰეილიმ.

გაერო-ში აშშ-ს ელჩმა ასევე აღნიშნა, რომ აშშ ყურადღებით დააკვირდება იმას, თუ ვინ უჭერს მას მხარს გაერო-ში და ვინ არა.

„ამერიკა კვლავ ხელგაშლილი ქვეყანა იქნება, ვინაიდან ეს ამერიკული წესია, თუმცა ჩვენ არ მივცემთ კარტ-ბლანშს იმ ქვეყნებს, ვინც ჩვენს წინააღმდეგ მოქმედებს. ამერიკისთვის ახალი დღე დადგა - ეს დიდი დღეა“, - დასძინა მან.