აბსოლუტურად ვაცნობიერებთ, რომ ხორავას ქუჩაზე მომხდარი მკვლელობის საქმე არის ძალზედ მნიშვნელოვანი საქმე, რომელზეც უნდა დადგეს ისეთი განაჩენი, რომლის სამართლიანობას ეჭვქვეშ ვერავინ დააყენებს, - ამის შესახებ ჟურნალისტებს შესაბამის საკითხზე კომენტირებისას შინაგან საქმეთა მინისტრმა გიორგი გახარიამ განუცხადა.

როგორც გახარიამ აღნიშნა, გამოძიების პროცესი სწორი გზით მიდის.

„მიმდინარეობს გამოძიება, დანიშნულია ექსპერტიზები. მე მესმის ადვოკატების - ხშირად იყენებენ მედიაგანცხადებებს თავიანთი სტრატეგიის განსახორციელებლად. ჩვენ ერთმნიშვნელოვნად ვთვლით, რომ გამოძიების პროცესი მიდის სწორი გზით. თუ იქნება დამატებითი ფაქტორები გამოვლენილი, რა თქმა უნდა, ყველაფერი იქნება გათვალისწინებული. პროცესი გადაინაცვლებს სასამართლოში და ის შეჯიბრებითობის პრინციპი, რომელზეც არის დაფუძნებული სასამართლო, მოიტანს ერთმნიშვნელოვნად სწორ შედეგს. რა თქმა უნდა, ჩვენ, აბსოლუტურად ვაცნობიერებთ, რომ ეს არის ძალზედ მნიშვნელოვანი საქმე, რომელზეც უნდა დადგეს ისეთი განაჩენი, რომლის სამართლიანობას ეჭვქვეშ ვერავინ დააყენებს“, - განაცხადა შს მინისტრმა.

შეგახსენებთ, რომ ხორავას ქუჩაზე 1-ელ დეკემბერს, სკოლის მოსწავლეებს შორის მომხდარი დაპირისპირებისას ორი არასრულწლოვანი ცივი იარაღით მოკლეს.