დღეს, გმირთა მოედანზე, 1992 წლის 2 თებერვალს დაღუპულთა სულის მოსახსენებელ პანაშვიდს გადაიხდიან, - ამის შესახებ „ინტერპრესნიუსს“ „თავისუფალი საქართველოდან“ აცნობეს.
როგორც პარტიის განცხადებაშია აღნიშნული, 1992 წლის იანვრიდან, სამხედრო გადატრიალების შემდეგ, მთელი ქვეყნის მასშტაბით ეწყობოდა პრეზიდენტ ზვიად გამსახურდიას მომხრეების მრავალათასიანი საპროტესტო აქციები.
„2 თებერვალს კანონიერი ხელისუფლების მხარდამჭერებმა მშვიდობიანი მანიფესტაცია თბილისის ცენტრში, გმირთა მოედნის მიმდებარე ტერიტორიაზე გამართეს, სადაც მათ უკანონო ბანდფორმირებებმა პირდაპირი დამიზნებით გაუხსნეს ცეცხლი. დაიღუპა ათობით და დაშავდა ასობით მშვიდობიანი მომიტინგე. ეს ფაქტი არასდროს ყოფილა გამოძიებული არც ერთი სახელმწიფო უწყების მიერ. ამ ტრაგიკული თარიღის აღსანიშნავად, 11:30 საათზე, გმირთა მოედანზე პანაშვიდი გაიმართება, ხოლო 13:30 საათზე პარტია „თავისუფალი საქართველოს“ მიერ დაგეგმილია კონფერენცია, რომელშიც მონაწილეობას მიიღებენ სამოქალაქო საზოგადოების წარმომადგენლები, პოლიტიკოსები, ამ მოვლენების დროს დაზარალებული პირები და მათი ოჯახის წევრები. კონფერენციაზე მოწვეული არიან აგრეთვე ხელისუფლების და დიპლომატიური კორპუსის წარმომადგენლები“, - ნათქვამია პარტიის მიერ გავრცელებულ განცხადებაში.