ახალგაზრდებს შორის კრივში საქართველოს ჩემპიონატი დაიწყო

ახალგაზრდებს შორის კრივში საქართველოს ჩემპიონატი დაიწყო. ამის შესახებ „ინტერპრესნიუსს“ კულტურისა და სპორტის სამინისტროდან აცნობეს.

უწყების ინფორმაციით, საქართველოს ჩემპიონატს გლდანში მდებარე კრივის დარბაზი მასპინძლობს. 1-4 თებერვალს საუკეთესო მოკრივეები 10 წონით კატეგორიაში გამოვლინდებიან. შეჯიბრებაში მონაწილეობას 100-მდე სპორტსმენი იღებს თბილისიდან და რეგიონებიდან.

ჩემპიონატის გახსნის ცერემონიას კულტურისა და სპორტის მინისტრის მოადგილე შალვა გოგოლაძე და კრივის ეროვნული ფედერაციის პრეზიდენტი დავით წიკლაური დაესწრნენ. შალვა გოგოლაძემ ჩემპიონატის მნიშვნელობაზე ისაუბრა და იმედი გამოთქვა, რომ წლევანდელი წელი ქართული კრივისთვის შარშანდელზე უფრო წარმატებული იქნება. დავით წიკლაურის თქმით კი, ჩემპიონატში ნაჩვენები შედეგების მიხედვით დაკომპლექტდება საქართველოს ახალგაზრდული ნაკრები, რომელსაც წინ მსოფლიოსა და ევროპის ჩემპიონატები ელოდება.

შეჯიბრება 4 თებერვალს დასრულდება. ამ დღეს გაიმართება ფინალური შეხვედრები და გამოვლინდებიან საუკეთესო მოკრივეები. 2018 წელს ახალგაზრდა მოკრივეები მსოფლიოსა და ევროპის პირველობებზე ასპარეზობის გარდა, ახალგაზრდული ოლიმპიური თამაშების ლიცენზიებისთვის იბრძოლებენ, რომელსაც ოქტომბერში ბუენოს-აირესი უმასპინძლებს.