კახა კალაძე - რა მაქვს სადებატო „ნაციონალურ მოძრაობასთან“, როდესაც ჯერ გენგეგმა არ არსებობს?

გაუგებარია გავმართოთ დებატები გენერალურ გეგმაზე, რა მაქვს სადებატო „ნაციონალურ მოძრაობასთან“, როდესაც ჯერ გენგეგმა არ არსებობს? - ამის შესახებ თბილისის მერმა კახი კალაძემ ჟურნალისტებს განუცხადა, რომელმაც კომენტარი გააკეთა საკრებულოს ”ნაციონალური მოძრაობის” დეპუტატის, ნიკა ვაჩეიშვილის განცხადებაზე. ვაჩეიშვილის განცხადებით, გენერალური განვითარების გეგმაზე დაინტერესებული მხარეების მონაწილეობით დებატები უნდა დაიწყოს.

კახა კალაძის თქმით, გენგეგმის შემუშავებაში ჩართულია თავად გენგეგმაზე მომუშავე ჯგუფი, საერთაშორისო და ადგილობრივი ექსპერტები.

”მე მივმართე ყველას, პოლიტიკურ პარტიებს, ვისაც სურვილი გააჩნია მიიღონ მონაწილეობა ამ განხილვებში, წარმოადგინონ თითო კომპეტენტური ადამიანი. ჩვენ ყველანაირ დოკუმენტაციას მივაწვდით, რაც დღეს მერიაში არსებობს. ჩაერთონ ამ ჯგუფში და ერთად განვიხილოთ. მივიღოთ დოკუმენტი, რომელიც დედაქალაქისთვის სასიცოცხლოდ მნიშვნელოვანია. აქ სადებატო არაფერია”, - განაცხადა კახა კალაძემ.