ტელეკომპანია "კავკასიის" დირექტორის ნინო ჯანგირაშვილის განცხადებით, „საზოგადოებრივ მაუწყებელში“ სხვადასხვა სახის დარღვევები არსებობს, რის გამოც ტელევიზიაში კრიზისია შექმნილი. ამის შესახებ ჯანგირაშვილმა ჟურნალისტებს სასტუმრო "რუმსში" განუცხადა, სადაც ამ წუთებში მაუწყებელში მიმდინარე მოვლენებთან დაკავშირებით "საერაშორისო გამჭვირვალობა - საქართველო" შეხვედრას მართავს.

შეხვედრას 15-მდე არასამთავრობო ორგანიზაცია, საზოგადო მოღვაწეები და მედიის წარმომადგენლებიც ესწრებიან.

"ვასუბრობთ იმაზე, რომ „საზოგადოებრივ მაუწყებელში“ რეალურად ყველა თვალსაზრისით კრიზისია. სისტემური კრიზისია და რომელიც შემდეგ ვლინდება ხან ბუღალტრის მიერ შეცდომით გადარიცხულ ხელფასში, ხან ეთერში არაადამიანური და არანორმალური რეპორტაჟის გაშვებაში, მენეჯმენტის თავნებობაში, ხელფასების გაუმჭვირვალედ ხარჯვაში და ა.შ. შეხვედრაზე მყოფი ყველა პირი თანხმდება იმაზე, რომ „საზოგადოებრივ მაუწყებელში“ რეალური კრიზისია და ეს პრობლემა უნდა მოგვარდეს. სამოქალაქო საზოგადოებას და ყველა ჩვენგანს არ გვაქვს იმის უფლება, რომ ასე ვისხდეთ და ვუყუროთ, როგორ იყრება წყალში ჩვენი ფული", - განაცხადა ჯანგირაშვილმა.