ჩვენ ევროკავშირის სრულფასოვანი წევრობა გვსურს. სხვა ვარიანტი არ გვაწყობს, - განაცხადა თურქეთის პრეზიდენტმა რეჯეფ თაიფ ერდოღანმა იტალიურ გამოცემა La Stampa-სთვის მიცემულ ინტერვიუში.

მისი თქმით, თურქეთისთვის მხოლოდ ევროკავშირში წევრობაა მისაღები.

„ევროკავშირმა თავისი დაპირება უნდა შეასრულოს. ევროკავშირი ბლოკავს მოლაპარაკებებს და გვაგებინებს, რომ ამ მოლაპარაკებების პროგრესი მხოლოდ ჩვენზეა დამოკიდებული. ეს უსამართლოა. ევროკავშირის წევრობის გარდა, სხვა ვარიანტი ჩვენთვის მიუღებელია“, - აღნიშნა თურქეთის ლიდერმა.

აღსანიშნავია, რომ იანვარში საფრანგეთის პრეზიდენტმა რეჯეფ თაიფ ერდოღანთან შეხვედრისას განაცხადა, რომ თურქეთთან პარტნიორობის შესახებ შეთანხმება უნდა დაიდოს.

თურქეთის პრეზიდენტმა ასევე აღნიშნა, რომ მისი ქვეყანა მნიშვნელოვან როლს თამაშობს სირიელ დევნილებთან დაკავშირებული საკითხის გადაჭრაში.

„ჩვენ ამ პროცესში მნიშვნელოვანი ვართ, ვინაიდან მიგრანტების ნაკადს ვაკავებთ აღმოსავლეთიდან და ევროპის სტაბილურობასა და უსაფრთხოებას ვუზრუნველყოფთ“, - დასძინა მან.