ირაკლი ხმალაძე - მოცემული ფაქტობრივი და სამართლებრივი გარემოებების ანალიზის საფუძველზე, ატენის ქუჩაზე მშენებლობის შეჩერების გადაწყვეტილება არ მივიღეთ

მოცემული ფაქტობრივი და სამართლებრივი გარემოებების ანალიზის საფუძველზე, ატენის ქუჩაზე მიმდინარე მშენებლობის შეჩერების გადაწყვეტილება არ მივიღეთ, - ამის შესახებ თბილისის ვიცე მერმა ირაკლი ხმალაძემ განაცხადა.

როგორც ირაკლი ხმალაძემ აღნიშნა, ამ ეტაპზე თბილისის მერიამ იმსჯელა მშენებლობის შეჩერება-არშეჩერების შესახებ, თუმცა ატენის ქუჩის მოსახლეობის ნაწილის საჩივარზე, რომლითაც ისინი მშენებლობის ნებართვის გაუქმებას ითხოვენ, მერიას არსებითი გადაწყვეტილება ჯერ არ მიუღია.

„თბილისის მერია მოქმედებს სამართლის პრინციპებისა და მოქმედი კანონმდებლობის ჩარჩოებში. მოცემული ფაქტობრივი და სამართლებრივი გარემოებების ანალიზის საფუძველზე, ამჯერად არ მივიღეთ გადაწყვეტილება მშენებლობის შეჩერების შესახებ. ჩვენ ასევე მხედველობაში მივიღეთ სააპელაციო სასამართლოს გადაწყვეტილებაც, რომელმაც არ შეაჩერა ატენის ქუჩაზე მიმდინარე მშენებლობასთან დაკავშირებული სამართალწარმოების პროცესი, ვინაიდან არც მაშინ და არც დღეს არ არსებობდა ამის სათანადო სამართლებრივი გარემოებები და საფუძვლები“, - განაცხადა ხმალაძემ.

რაც შეეხება ადვოკატ დიმიტრი გაბუნიას განცხადებას, რომელიც მერიის გადაწყვეტილებას სასამართლოში გაასაჩივრებს და მიმართავს პროკურატურასაც, ხმალაძის თქმით, სასამართლოსადმი და პროკურატურისადმი მიმართვის უფლება ყველას აქვს. „შეუძლიათ მიმართონ და მიეცემა შესაბამისი მსვლელობაც და რეაგირებაც“, - დასძინა ხმალაძემ.

ატენის ქუჩის მოსახლეობის ნაწილი ამავე ქუჩაზე მრავალსართულიანი კორპუსის მშენებლობას აპროტესტებს. მათი ადვოკატის, დიმიტრი გაბუნიას განცხადებით, მიმდინარე მშენებლობის შეჩერებაზე თბილისის მერიის უარს თბილისის საქალაქო სასამართლოში გაასაჩივრებენ.

ამასთან, დიმიტრი გაბუნია გეგმავს, რომ მიმართოს პროკურატურას და მოითხოვოს ყველა იმ თანამდებობის პირის სისხლის სამართლის პასუხისგებაში მიცემა, რომლებმაც ატენის ქუჩაზე მიმდინარე მშენებლობასთან დაკავშირებით სასამართლოს წინა გადაწყვეტილება არ გაითვალისწინეს.

ადვოკატი გეგმავს, მიმართოს არასამთავრობო ორგანიზაციებსა და დიპლომატიურ კორპუსს, რომ "საქართველოში დღეს სამწუხაროდ, ადგილი აქვს კონსტიტუციური ნორმების უგუველებელყოფას, საკუთრებისა და სიცოცხლის ხელყოფას".

ავთანდილ წულაძე - მაკრონის, შოლცისა და ტუსკის შეხვედრის შემდეგ ცხადი გახდა, რომ უკრაინის იარაღის გარეშე დატოვების გეგმა ჩავარდა, ევროპისა და უკრაინა-რუსეთს შორის სამხედრო დაპირისპირება გაგრძელდება  და გაღრმავდება
„საქართველო მეცნიერების ქვეყანაა“ - აკადემიკოსი როინ მეტრეველი
ქართული პრესის მიმოხილვა 18.03.2024
Webster University Georgia-ს ფსიქოლოგიის საბაკალავრო პროგრამა დაემატა
Webster University Georgia-ს კომპიუტერული მეცნიერებების საბაკალავრო პროგრამა დაემატა