კულტურისა და სპორტის მინისტრი მიხეილ გიორგაძე, დღეს გორში სპორტული ინფრასტრუქტურის მშენებლობას დაათვალიერებს. როგორც „ინტერპრესნიუსს“ კულტურისა და სპორტის სამინისტროდან აცნობეს, სპორტის სასახლის სარემონტო სამუშაოების ფინალურ ეტაპს კულტურისა და სპორტის მინისტრი მიხეილ გიორგაძე და მშენებელი კანადური კომპანიის „ბეჰლენ ინდასთრი“ პრეზიდენტი და მფლობელი პოლ კანინგემი გორში დღეს დაათვალიერებენ.

ღონისძიებას დაესწრებიან პარლამენტის სპორტისა და ახალგაზრდულ საქმეთა კომიტეტის თავმჯდომარე მიხეილ ყაველაშვილი, გუბერნატორის ადმინისტრაციის, ადგილობრივი თვითმმართველობისა და საკანონმდებლო ორგანოს წარმომადგენლები, ვეტერანი და მოქმედი სპორტსმენები, სპორტული ჟურნალისტები.

სამინისტროს ინფორმაციით, გორში, თელავსა და ბათუმში უპრეცედენტო მასშტაბის სპორტული ინფრასტრუქტურის მშენებლობა დასასრულს უახლოვდება.

სამივე პროექტის საერთო ღირებულება 34 მილიონ დოლარს აღწევს. თელავსა და გორში დიდი დარბაზი 1 500 მაყურებელს დაიტევს, პატარა - 500, ხოლო ბათუმში დიდი დარბაზი 2 500, პატარა 500 მაყურებელზეა გათვლილი. სპორტის სასახლეების მიმდებარედ დასასვენებელი სკვერების მოწყობაც იგეგმება.

„პარალელურად, თბილისსა და ქუთაისში საფეხბურთო და სარაგბო 10 მოედნის მშენებლობა მიმდინარეობს. პროექტის ღირებულებაა 10 700 000 ლარი. საერთო ჯამში, კულტურისა და სპორტის სამინისტროს მშენებარე სპორტულ ობიექტზე 1 000-მდე ადამიანია დასაქმებული“, – აცხადებენ სამინისტროში.