ეკა ბესელია - დარწმუნებული ვარ, რომ მუსტაფა ემრე ჩაბუქთან მიმართებაში ყველა პროცედურა კანონის შესაბამისად განხორციელდება

დეპუტატი ეკა ბესელია დარწმუნებულია, რომ მუსტაფა ემრე ჩაბუქთან მიმართებაში ყველა პროცედურა კანონის შესაბამისად განხორციელდება. როგორც ბესელიამ ჟურნალისტებს საკითხზე კომენტირებისას განუცხადა, სასამართლოს გადაწყვეტილებაში ვერავინ ჩაერევა.

“უნდა დაველოდოთ სასამართლოს პროცედურებს. ბუნებრივია, სასამართლოს გადაწყვეტილების მიღებაში ვერავინ ჩაერევა. ექსტრადიცია ცალკე პროცედურაა, ლტოლვილის სტატუსი- ცალკე. ეს არის ცალ-ცალკე სამართლებრივი ეტაპი. მე იმედი მაქვს და დარწმუნებული ვარ, რომ ყველა პროცედურა კანონის შესაბამისად განხორციელდება“, - განაცხადა ეკა ბესელიამ.

შეგახსენებთ, რომ 24 თებერვალს მუსტაფა ემრე ჩაბუქს საექსტრადიციო პატიმრობის ვადა ეწურება.

მუსტაფა ემრე ჩაბუქი 24 მაისს დააკავეს. მიზეზი თურქული მხარის მოთხოვნა იყო, რომელიც ამტკიცებს, რომ ჩაბუქი ფეთჰულა გიულენის ტერორისტული ორგანიზაციის საქმიანობას უწყობდა ხელს.