საქართველოს ბიზნესომბუდსმენი სფეროში მოღვაწე კომპანიებთან და სხვა დაინტერესებულ პირებთან შეხვედრებს განაგრძობს. ბიზნესომბუდსმენის აპარატის ინფორმაციით, ირაკლი ლექვინაძე დღეს საკონსულტაციო და იურდიული კომპანიების წარმომადგენლებს შეხვდა.

ბიზნესომბუდსმენის განცხადებით, ვინაიდან საკონსულტაციო და იურდიულ კომპანიებს ხშირად უწევთ ბიზნესთან დაკავშირებული სხვადასხვა საკითხის განხილვა და მათ კარგად ესმით, თუ რა თემები და გამოწვევები დგას დღეს მეწარმეების წინაშე, ინფორმაციების გაცვლა მნიშვნელოვანია.

მათვე ინფორმაციით, გაცნობითი ხასიათის შეხვედრაზე მხარეებმა სამომავლო თანამშრომლობის ფორმატი განიხილეს და პრიორიტეტებზე იმსჯელეს. შეხვედრას 30-მდე საკონსულტაციო და იურიდიული კომპანიის წარმომადგენელი ესწრებოდა.

ბიზნესომბუდსმენი ირაკლი ლექვინაძე მიმდინარე კვირას შეხვედრას არასამთავრობო ორგანიზაციების წარმომადგენლებთანაც გეგმავს, მოგვიანებით კი დაწყებული შეხვედრების ციკლი მსხვილ და მცირე ბიზნეს-გაერთიანებებთან გაგრძელდება.