თუკი სახელმწიფო ვერ იცავს მოქალაქეებს, მოქალაქეები იძულებული გახდებიან, თავად დაიცვან საკუთარი თავი, - ამის შესახებ ჟურნალისტებს ვეტერანთა დეპარტამენტის ყოფილმა თავმჯდომარე ირაკლი შიხიაშვილმა განუცხადა, რითაც დოდო გუგეშაშვილსა და მის შვილზე განხორციელებულ თავდასხმას გამოეხმაურა.

შიხიაშვილი ცოტა ხნის წინ ღუდუშაურის კლინიკაში მივიდა, სადაც ცეცხლსასროლი იარაღით დაჭრილ დოდო გუგეშაშვილს ოპერაცია ჩაუტარდა.

"არანაირი ინფორმაცია არ მაქვს. თუკი სახელმწიფო ვერ იცავს მოქალაქეებს, მოქალაქეები იძულებული გახდებიან, თავად დაიცვან საკუთარი თავი. ეს არის უბედურება დღეს. არ ვამბობ, რომ ხალხმა იარაღით უნდა იაროს, მაგრამ სახელმწიფომ უნდა დაიცვას მოქალაქეები.

ფაქტია, რომ მოკლეს ახალგაზრდა ბიჭი, რომელსაც არაფერი დაუშავებია ამ ქვეყანაზე, კარგის გარდა არაფერი გაუკეთებია. ის იყო ღირსეული ახალგაზრდა, რომელსაც მე დიდ პატივს ვცემდი. ის ჩემთან ერთად მუშაობდა," - განაცხადა ირაკლი შიხიაშვილმა.