ბათუმის საკრებულოს თავმჯდომარის სულიკო თებიძის განცხადებით, "ერთიანი ნაციონალური მოძრაობის" დეპუტატი მირდატ ქამადაძე კერძო საადვოკატო საქმიანობას ეწევა. როგორც სულიკო თებიძე აცხადებს, დეპუტატის მხრიდან ეს არის კანონმდებლობის უხეში დარღვევა. სულიკო თებიძის თქმით, თუ მირდატ ქამადაძე კერძო საადვოკატო საქმიანობას არ შეწყვეტს, მის წინააღმდეგ შესაბამისი სანქციები გატარდება. რა ღონისძიებები გატარდება მირდატ ქამადაძის მიმართ, ბათუმის საკრებულოს თავმჯდომარე არ ასახელებს.
"ქალაქ ბათუმის საკრებულოს ფრაქცია "ერთიანი ნაციონალური მოძრაობის" დეპუტატის მირდატ ქამადაძის მხრიდან უხეში კანონმდებლობის დარღვევა ფიქსირდება. საკრებულოს მოქმედი დეპუტატი კერძო საადვოკატო საქმიანობას კვლავაც აგრძელებს. ვფიქრობთ, რომ ადვოკატმა მირდატ ქამადაძემ არ იცის კანონმდებლობა. მივმართავთ ადვოკატთა ასოციაციას, ასევე მირდატ ქამადაძეს, მოვუწოდებთ, რომ დარჩეს პოლიტიკურ თანამდებობაზე, ან საადვოკატო საქმიანობაზე, წინააღმდეგ შემთხვევაში, გამოიყენება შესაბამისი ღონისძიებები", - განაცხადა სულიკო თებიძემ.