თბილისის სატრანსპორტო კომპანიის ხელმძღვანელის მოადგილე ნუგზარ ჭეიშვილი, შესაძლოა, ერთ-ერთი იყოს იმ პირთა შორის, რომელიც ვარკეთილის მეტროში მომხდარი შემთხვევის გამო, თანამდებობას დატოვებს. სწორედ ჭეიშვილი იყო სატრანსპორტო კომპანიის ხელმძღვანელი იმ პერიოდში, როცა მეტროსადგურ „ვარკეთილის“ რეაბილიტაცია განხორციელდა.

სატრანსპორტო კომპანიის მოქმედი ხელმძღვანელი მამუკა კობახიძე ნუგზარ ჭეიშვილის მიერ თანამდებობის შესაძლო დატოვებას პირდაპირ არ ადასტურებს, თუმცა აღნიშნავს, რომ გათავისუფლდება ყველა ის პირი, რომელიც შესაბამის ტენდერსა და შესრულებული სამუშაოების შესრულებაში მონაწილეობდა.

"როგორც მოგეხსენებათ, ვარკეთილის მეტროში მოხდა ჭერის ჩამონგრევა. სამუშაოები დაუკვეთა თბილისის სატრანსპორტო კომპანიამ და ფაქტი ერთია, იყო ხარვეზები როგორც საპროექტო, ასევე სამშენებლო დონეზე. რა ეტაპზე დაუშვეს ხარვეზები, ამაზე გამოძიება მიმდინარეობს და შედეგს ისინი ადებენ. თუმცა, მანამდე თუ რომელიმე თანამშრომელს სამშენებლო ან საპროექტო სამუშაოებთან შეხება ჰქონდა, ყველა გათავისუფლდება თანამდებობიდან.

ვინც პასუხისმგებელი იყო აღნიშნული სამუშაოების წარმოებაზე, ან მიღება-ჩაბარებაზე, ყველა დატოვებს სამსახურს. გვარ-სახელებზე და რაოდენობაზე მოგვიანებით გავაკეთებ კომენტარს. საპროექტო სამუშაოებზე ტენდერი გამოაცხადა და მიიღო სატრანსპოტო კომპანიამ, სამშენებლო სამუშაოებზე გამოაცხდა ტენდერი და მიიღო სატრანსპორტო კომპანიამ, შესაბამისად, თუ სადმე ხარვეზი იყო დაშვებული, სატრანსპორტო კომპანია იყო პასუხისმგებელი,"- განაცხადა მამუკა კობახიძემ.

თბილისის მერის, კახა კალაძის გადაწყვეტილებით, მეტროსადგურ "ვარკეთილში" მომხდარი შემთხვევის გამო, დაუყოვნებლივ გათავისუფლდებიან დაკავებული პოზიციებიდან ის ადამიანები, რომლებიც ჩართულები იყვნენ სატენდერო პროცედურებში. ამის შესახებ კალაძემ მუნიციპალიტეტის მთავრობის სხდომაზე განაცხადა.