მიხეილ სააკაშვილი - უკრაინაში კორუფციის პრობლემის გადაჭრის გასაღები ევროპულ დედაქალაქებში დევს

საქართველოს ყოფილი პრეზიდენტის მიხეილ სააკაშვილის აზრით, უკრაინაში კორუფციის პრობლემის გადაჭრა მხოლოდ ევროკავშირის დახმარებითაა შესაძლებელი.

ამის შესახებ მიხეილ სააკაშვილმა გერმანული გამოცემა „დოიჩე ველესთვის“ მიცემულ ინტერვიუში განაცხადა.

„უკრაინაში კორუფციის პრობლემის გადაჭრის გასაღები ევროპულ დედაქალაქებში დევს“, - აღნიშნა საქართველოს ყოფილმა პრეზიდენტმა.

მისი აზრით, ამის ეფექტური საშუალება შეიძლება იყოს ევროკავშირის მიერ უკრაინელი კორუფციონერების სიის შექმნა, „მაგნიტსკის სიის“ მსგავსად, რაც გაითვალისწინებდა შემზღუდველი ზომების შემოღებას კორუფციონერებისთვის.

„ამგვარი ანტიკორუფციული ზომების გატარება დააჩქარებდა უკრაინაში ცვლილებებს. გარდა ამისა, დასავლეთის ცალკე ბანკებმა და ფინანსურმა ინსტიტუტებმა უნდა შეწყვიტონ თამაში კორუმპირებულ ოლიგარქებთან“, - განაცხადა სააკაშვილმა.