კიევის საოლქო ადმინისტრაციულ სასამართლოში პოლონეთში გაძევების გადაწყვეტილების გაუქმების მოთხოვნით, საქართველოს ყოფილი პრეზიდენტის მიხეილ სააკაშვილის სარჩელი შევიდა.
ამის შესახებ ინფორმაციას სასამართლოს პრესსამსახური ავრცელებს.
„მოსარჩელე სასამართლოს თხოვს არაკანონიერად სცნოს სახელმწიფო საიმიგრაციო სამსახურის, სახელმწიფო სასაზღვრო სამსახურისა და შსს-ს ქმედებები, რომელიც დათარიღებულია 2018 წლის 12 თებერვლით, რომლის თანახმად, მიხეილ სააკაშვილის პოლონეთში დაბრუნება მოხდა“, - ნათქვამია სასამართლოს განცხადებაში.
მიხეილ სააკაშვილი სასამართლოს სთხოვს გააუქმოს სახელმწიფო საიმიგრაციო სამსახურის აღნიშნული გადაწყვეტილება. ამჟამად სასამართლო ადმინისტრატიული საქმის აღძრის საკითხს განიხილავს.