აღმოსავლეთ ღუთაში, დამასკოს გარეუბანში ავიაშეტევებისა და დაბომბვების შედეგად, სულ მცირე 98 ადამიანი დაიღუპა, - იუწყება „დოიჩე ველე“.
სირიის ადამიანის უფლებათა ობსერვატორიის წარმომადგენლების ინფორმაციით, დაღუპულებს შორის არიან ქალები და ბავშვები. ჰუმანიტარული ორგანიზაცია „თეთრი ჩაფხუტების“ ინფორმაციით კი, დაღუპულთა რიცხვი 100-ს აჭარბებს, 300-ზე მეტი ადამიანი კი დაჭრილია.
„საარტილერიო დარტყმებისა და დაბომბვების ინტენსივობა მოწმობს, რომ შეტევა სირიის სამთავრობო არმიის მიერ იყო მომზადებული“, - განაცხადა სირიის ადამიანის უფლებათა ობსერვატორიის ხელმღვანელმა რამი აბდელ რაჰმანმა.
აღმოსავლეთ ღუთა ერთ-ერთი ბოლო ტერიტორიაა სირიაში, რომელიც ამბოხებულების ხელში რჩება. ქალაქი ოთხ წელზე მეტია ალყაშია. ქალაქში დაახლოებით 400 000 ადამიანია, რომელთაც არ მიეწოდებათ ჰუმანიტარული დახმარება.