გასული წლის 17 აგვისტოს ბარსელონასა და კამბრილსში მომხდარი ტერაქტების ერთ-ერთ ორგანიზატორთან კავშირში ბრალდებული სამი ადამიანი საფრანგეთში დააკავეს. ამის შესახებ ესპანეთის შსს იუწყება.
„სამი ადამიანი პირდაპირ კავშირშია ტერორისტ დრის უქაბირთან, რომელიც ამჟამად პატიმრობაშია“, - ნათქვამია ესპანეთის შსს-ს განცხადებაში.
სამივე დაკავებულის აყვანის ოპერაცია საფრანგეთის გარის დეპარტამენტში ჩატარდა. ფრანგ სამართალდამცველებთან ერთად ოპერაციაში ესპანეთის სამოქალაქო გვარდია და კატალონიის პოლიცია მონაწილეობდნენ.
ბარსელონაში მომხდარი ტერაქტის შედეგად გარდაიცვალა 16 და დაშავდა 130-ზე მეტი ადამიანი. ტერაქტზე პასუხისმგებლობა „ისლამურმა სახელმწიფომ“ აიღო. ლიკვიდირებულია 8 ტერორისტი, კიდევ 4 პირი, მათ შორის დრის უქაბირი დაკავებულები არიან.