არ იქნებოდა სწორი ყველა მოსამართლის გაშვება, თუმცა გაცილებით არასწორია ის, რაც მოხდა - მათი აღზევება, - ამის შესახებ ”პალიტრანიუსის” გადაცემაში „360 გრადუსი“ პარლამენტის ყოფილმა თავმჯდომარემ, „შენების მოძრაობის“ ლიდერმა დავით უსუფაშვილმა განაცხადა.

მისი თქმით, 2012 წელს ახალმა ხელისუფლებამ სასამართლო სისტემაც და მოსამართლეებიც მემკვიდრეობით მიიღო და თავიდანვე აცნობიერებდა, რომ ამ მიმართულებით პრობლემები ჰქონდა.

„2012 წლის ხელისუფლების ფუნდამენტური ცვლილების შემდეგ ახალი ხელისუფლება იდგა იმის წინაშე, რომ მან მემკვიდრეობით მიიღო სასამართლო სისტემა და მოსამართლეები, რომელთა დანიშვნა და საქმიანობის სტილის განსაზღვრა მთლიანად წინა ხელისუფლების დამსახურება იყო. ჩვენ ვიცოდით, რომ ერთ-ერთი პრობლემა სწორედ მართლმსაჯულების სისტემაში გვქონდა. არ იქნებოდა სწორი ყველა მოსამართლის გაშვება, თუმცა გაცილებით არასწორია ის, რაც მოხდა - მათი აღზევება”, - განაცხადა დავით უსუფაშვილმა.