ადვოკატი იოსებ ბარათაშვილი პაატა ბურჭულაძის მეუღლის ანჟელა ვასილენკოს გამოკითხვასთან დაკავშირებით პროკურატურას საერთაშორისო ნორმების დაცვისკენ მოუწოდებს.

როგორც „ინტერპრესნიუსთან“ საუბრისას იოსებ ბარათაშვილმა განაცხადა, ანჟელა ვასილენკო გერმანიის მოქალაქეა და თუ საქართველოს საგამოძიებო უწყება მის გამოკითხვას აპირებს, პროცესი უნდა დაუქვემდებაროს საერთაშორისო თანამშრომლობის ნორმებს.

„პროკურატურას მივმართეთ და მივუთითეთ, რომ ანჟელა ვასილენკო არის გერმანიის მოქალაქე, ცხოვრობს გერმანიაში და ამიტომ, საგამოძიებო ორგანოში დაბარებასა და გამოკითხვას ექვემდებარება სისხლის სამართლის სფეროში საერთაშორისო თანამშრომლობის შესახებ საქართველოს კანონის მეშვიდე მუხლის შესაბამისად, რაც გულისხმობს განსხვავებული წესით მიმართვას, ასევე მგზავრობის ხარჯების ანაზღაურებას და იმ შემთხვევაში თუ პირი მუშაობს და უცდება სამუშაო დრო, ასევე განაცდურის ანაზღაურებასაც. პროკურატურას თუ სურს მისი დაბარება და გამოკითხვა, ის უნდა გამოიძახონ კანონით დადგენილი წესით“, - განაცხადა იოსებ ბარათაშვილმა.

ანჟელა ვასილენკო პროკურატურაში ფონდ „იავნანადან“ თანხების არამიზნობრივად გაფლანგვის საქმეზე დაიბარეს.