სავაჭრო ცენტრ ”ქალაქის გულის” იმ მოვაჭრეთა სიების შედგენა დაიწყო, რომლებიც თავის სამუშაო ადგილზე უნდა შევიდნენ, რათა ხანძარს გადარჩენილი სავაჭრო საქონელი გარეთ გამოიტანონ, - ამის შესახებ „ინტერპრესნიუსს“ მოვაჭრეთა ადვოკატმა გიგა კვერენჩხილაძემ განუცხადა.

მისივე ინფორმაციით, თავდაპირველად შევლენ ის მოვაჭრეები, რომლებსაც მალფუჭებადი პროდუქცია აქვთ, ხოლო სხვა მოვაჭრეების შეშვება დღეს ეტაპობრივად მოხდება.

”სიების შედგენა დაიწყო. ეტაპობრივად მოხდება მოვაჭრეების შესვლა. 3-3 ან 5-5 კაცი შევა ადგილზე. ნახავს თავის პროდუქციას და რაც საღია, ბუნებრივია, გარეთ გამოიტანს. ასე მოხდება ჯგუფურად შესვლა. ეს პროცესი ალბათ დღეს დასრულდება”, - განაცხადა კვერენჩხილაძემ.

შეგახსენებთ, რომ ხანძარი სავაჭრო ცეტრ ”ქალაქის გულში” 27 თებერვალს გაჩნდა, რის შედეგად 3000 კვ.მ-ზე მეტი ფართი დაიწვა.