ბორჯომის საკრებულოს თავმჯდომარის, ზაზა ჩაჩანიძის განცხადებით, მას და მის ოპოზიციონერ კოლეგებს საკრებულოს შენობაში შესვლის და მუშაობის საშუალება არ ეძლევათ. ამის შესახებ ზაზა ჩაჩანიძემ ”ინტერპრესნიუსს” განუცხადა.
მისი თქმით, მან სამართალდაცველებისგან ვერ მოისმინა ახსნა-განმარტება, თუ რატომ არ ეძლევა მას შენობაში შესვლის საშუალება.
რაც შეეხება ბორჯომის მუნიციპალიტეტის შენობას, ამ დროისთვის შენობაში იმყოფებიან საკრებულოს თანამშრომლები, რომლებიც პარტია „ქართული ოცნებას“ წარმოადგენენ, ასევე ბორჯომის მერიის თანამშრომლები.
ბორჯომის მუნიციპალიტეტის საკრებულოში გუშინ, დღის განმავლობაში სიტყვიერი და ფიზიკური დაპირისპირება რამდენჯერმე მოხდა. საკრებულოში ბორჯომის მერიის თანამშრომლების ხელფასების მატების საკითხის განხილვა იყო დაგეგმილი. ტელეკომპანია „ბორჯომის“ ინფორმაციით, 26 დეპუტატიდან საკითხის დამტკიცებას მხარი "ქართული ოცნების" 11-მა დეპუტატმა დაუჭირა. 15-მა ოპოზიციონერმა დეპუტატმა კი აღნიშნულ საკითხს მხარი არ დაუჭირა. შესაბამისად, ხმების არასაკმარისი რაოდენობის გამო, ხელფასების საკითხი თავდაპირველად ჩავარდა, რასაც
ბორჯომის მერიის თანამშრომლების პროტესტი მოჰყვა. ისინი დღეს გაფიცვას და ფართომასშტაბიან აქციებს აანონსებენ.
დღეს დილიდან კი ბორჯომში სამართალდამცველების დიდი რაოდენობა არის მობილიზებული.