კახა კალაძის ინფორმაციით, მერიის სამსახურების სტრუქტურული რეფორმის მეორე ეტაპი იწყება

თბილისის მერის კახა კალაძის ინფორმაციით, სსიპ-ებში და ა(ა)იპ-ებში მერიის სამსახურების სტრუქტურული რეფორმის მეორე ეტაპი იწყება. ამის შესახებ კალაძემ სიმონ ჯანაშიას სახელობის საქართველოს მუზეუმის ეზოში განაცხადა, სადაც საზოგადოებას მერის საქმიანობის 100 დღის ანგარიში წარუდგინა.

„ჩვენ განვახორციელეთ სტრუქტურული რეფორმა, რომლის მიზანია მოქალაქეზე ორიენტირებული, მოქნილი მართვის განხორციელება. გამოვაცხადეთ რეორგანიზაცია, რომელიც დამთავრდა, თუმცა მეორე ეტაპი იწყება სსიპ-ებში, ა(ა)იპ-ებში, შპს-ებში, რომელიც ასევე ღიად და გამჭვირვალედ განხორციელდება და ძალიან მალე დასრულდება“, - განაცხადა კალაძემ.

მისივე თქმით, ზემოაღნიშნული რეფორმის შედეგად შეიქმნა ურბანული განვითარების სამსახური და გაძლიერდა გარემოსდაცვითი მიმართულება.