აღმშენებლობაზე რამდენიც არ უნდა ვისაუბროთ, თუ ყველაფერი ხარისხიანად არ შესრულდება, ჩვენი განხორციელებული პროექტების ფასი „კაპიკი“ იქნება, - ამის შესახებ თბილისის მერმა კახა კალაძემ სიმონ ჯანაშიას სახელობის საქართველოს მუზეუმის ეზოში განაცხადა, სადაც მერის პოსტზე საქმიანობის 100 დღის ანგარიში წარადგინა.
„საკანონმდებლო დონეზე შეიქმნა ხარისხის კონტროლის ახალი მექანიზმი. რაც არ უნდა ვისაუბროთ განვითარებაზე, წინსვლაზე, აღმშენებლობაზე, თუ ეს ყველაფერი ხარისხიანად არ შესრულდება, „კაპიკი“ ექნება ფასი იმ პროექტებს, რომელსაც ჩვენ განვახორციელებთ. შესაბამისად, ამ მიმართულებით ვამკაცრებთ ჩვენს მიდგომებს. პროექტის დამუშავების დონეზე მოხდება მისი ექსპერტიზა და შემდეგ, მშენებლობის პროცესში განხორციელდება ზედამხედველობა, ისევე, როგორც მშენებლობის დასრულების შემდეგ, კონკრეტული პროექტების ჩაბარება მოხდება ექსპერტიზის საფუძველზე. მკაცრად გაკონტროლდება მშენებლობის ნორმები და უსაფრთოების სტანდარტები. ამ მიმართულებით დავიწყეთ მუშაობა, საკანონმდებლო ცვლილებები გვაქვს“, - განაცხადა კალაძემ და ამ კონტექსტში თანამშრომლობისთვის პარლამენტს მადლობა გადაუხადა.
„ჩვენ გვაქვს ძალიან ბევრი სამწუხარო ფაქტი, როდესაც ადამიანები იღუპებიან. რა თქმა უნდა, ამას ვერ შევეგუებით. შესაბამისად, ვამკაცრებთ რეგულაციებს, რომ მაქსიმალურად დაცული იყო მშენებლობაზე მომუშავე ადამიანების უსაფრთოება“, - განაცხადა კახა კალაძემ.