ავღანეთის სახელისუფლებო ძალებმა ბოლო დღე-ღამის განმავლობაში ქვეყნის სხვადასხვა პროვინციებში ავიადარტყმების შედეგად სულ მცირე 42 „ბოევიკი“ გაანადგურეს. ამის შესახებ ავღანეთის თავდაცვის სამინისტროზე დაყრდნობით ტელეარხი Tolo News იუწყება.
სამინისტროს ინფორმაციით, ჰელმანდის პროვინციაში ჩატარებული საჰაერო ოპერაციის დროს, რადიკალური მოძრაობა „თალიბანის“ 7 მებრძოლი დაიღუპა და 6 დაიჭრა. უროზგანის პროვინციაში ლიკვიდირებულია 15 და დაჭრილია 16 „ბოევიკი“. ჯუზჯანის პროვინციაში ავიადარტყმების შედეგად ტერორისტული დაჯგუფება „ისლამური სახელმწიფოს“ 20 მებრძოლია ლიკვიდირებული.
Tolo News-ის ინფორმაციით, ავიადარტყმების შედეგად განადგურებულია „ბოევიკების“ ორი ბაზა, სატრანსპორტო საშუალებები და იარაღის საწყობები.