სულ მცირე ერთი ადამიანი დაიღუპა თურქების საჰაერო ძალების დარტყმების შედეგად აფრინის რაიონში და 22 ადამიანი დაიჭრა, - იუწყება სირიის სამთავრობო სააგენტო SANA.

სააგენტოს ინფორმაციით, შეტევა ბრეინისა და თელ-ასუადის სოფლებში საცხოვრებელ სახლებზე მიიტანეს. შედეგად ქალაქების ინფრასტრუქტურამ სერიოზული ზიანი მიიღო. დაშავებულთა შორის არიან ქალები და ბავშვები.

20 იანვარს თურქეთმა დაიწყო სამხედრო ოპერაცია სახელწოდებით „ზეთისხილის ტოტი“, რომელიც „სახალხო თავდაცვის ძალების“ დანაყოფებისა და პარტია „დემოკრატიული ერთობის“ წინააღმდეგ არის მიმართული. თურქეთი აღნიშნულ ორგანიზაციებს ტერორისტულ დაჯგუფებებად მიიჩნევს. აფრინში 1.5 მილიონი ქურთი და სირიელი დევნილი ცხოვრობს.

თურქეთის გენშტაბის მიერ დღეს გამოქვეყნებული მონაცემების მიხედვით, ოპერაციის დაწყებიდან ქურთული დაჯგუფებებისა და „ისლამური სახელმწიფოს“ 2 777 წევრია ლიკვიდირებული.