თბილისის საქალაქო სასამართლოში, ხორავას ქუჩაზე მოზარდების მკვლელობის საქმეზე, დღეს 51-ე სკოლის ერთ-ერთი მოსწავლე დაიკითხება. როგორც ჟურნალისტებს ერთ-ერთი ბრალდებულის ადვოკატმა ეკა მაჭარაშვილმა განუცხადა, დღეს, შესაძლოა, დაიკითხონ სხვა მოწმეებიც.

"დღევანდელი პროცესი განახლდება ბრალდების მხარის მტკიცებულებათა გამოკვლევით. დღევანდელ პროცესზე დაიკითხება 51-ე სკოლის ერთ-ერთი მოსწავლე. ბრალდების მხარე სავარაუდოდ სხვა მოწმეებსაც წარმოადგენს, თუმცა ვინ იქნებიან ეს მოწმეები, ჩვენთვის ამ დროისთვის უცნობია. დაცვის მხარეს აღნიშნულ მოწმესთან ბევრი კითხვა გვექნება, ვინაიდან ის არის ბრალდების მხარის მოწმე. იგი ფაქტის მხილველი მოწმეა. თუ რა დაინახა შემთხვევის ადგილზე, ამასთან დაკავშირებით ბევრი კითხვა გვექნება", - განაცხადა მაჭარაშვილმა.

ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა.