რუსეთი და საქართველო შეთანხმდნენ იმაზე, რომ მიმდინარე წელს ზემო ლარსზე გვირაბის მშენებლობა დაიწყება. ამის შესახებ ჟურნალისტებს სომხეთის ტრანსპორტის მინისტრმა ვაჰან მარტიროსიანმა განუცხადა.
მისი თქმით, გვირაბის დაპროექტების ეტაპი დასასრულს უახლოვდება და არსებობს შეთანხმება საკონტროლო-გამშვები პუნქტის მოდერნიზებისა და გზის გაფართოების შესახებ.
„რა თქმა უნდა, გვირაბის მშენებლობა ასე მალე ვერ დასრულდება, ამისთვის დროა საჭირო, თუმცა ჩვენ იმედი გვაქვს, რომ სამუშაოების დანარჩენი ნაწილი წლის ბოლომდე დასრულდება“, - განაცხადა მარტიროსიანმა.
„რადიო თავისუფლების“ სომხეთის ბიუროს ინფორმაციით, სატრანსპორტო სფეროსთან დაკავშირებული საკითხები სომხეთში საქართველოს პრემიერ-მინისტრის ვიზიტის დროსაც განიხილებოდა. მიუხედავად იმისა, რომ უმაღლეს დონეზე გამართული შეხვედრების დროს ზემო ლარსზე საუბარი არ ყოფილა, სომხეთის პრემიერ-მინისტრმა კარენ კარაპეტიანმა ხაზი გაუსვა იმას, რომ სატრანსპორტო სფერო ორივე ქვეყნისთვის ძალიან მნიშვნელოვანია.