იუსტიციის სახლთან მიმდინარე ორივე აქცია დასრულებულია. ერთი აქცია ტრანსგენდერი ქალების უფლებების დასაცავი - „მე ვარ ქალი - აღიარე !" ქალთა მოძრაობამ გამართა. როგორც ქალთა მოძრაობაში აღნიშნავენ, ერთ-ერთი ყველაზე მწვავე პრობლემა, რაც საქართველოში ტრანსგენდერ ადამიანებს აწუხებთ, არის პირადობის მოწმობაში სქესის შეცვლის არაჰუმანური პროცედურა. ისინი მოითხოვდნენ, იუსტიციის სამინისტრომ პირადობის დამადასტურებელ დოკუმენტებში სქესის შეცვლა უზრუნველყოს ტრანსგენდერი ადამიანის მიერ შესაბამისი სამედიცინო დოკუმენტაციის წარდგენის საფუძველზე, რაც გულისხმობს გენდერული დისფორიის დიაგნოზს, მაგრამ არა სქესის კვლავმინიჭების ოპერაციის ცნობას.
აღნიშნული აქციის კონტრაქცია ორგანიზაცია „ზნეობის“ წარმომადგენლებმა გამართეს. ამ აქციის ერთ-ერთმა ორგანიზატორმა გურამ ფალავანდიშვილმა იმ ტერიტორიაზე, სადაც ტრანსგენდერი ქალები და რიგი არასამთავრობო ორგანიზაციების წარმომადგენლები იყვნენ შეკრებილები, კვერცხი ისროლა, რასაც სამართალდამცავების მხრიდან რეაგირება მოყვა და გურამ ფალავანდიშვილი ადმინისტრაციულ სამართალდარღვევის გამო დააკავეს.