პარლამენტის ეროვნული ბიბლიოთეკა „გალფთან“ ერთად, პროექტ „წიგნიერს“ იწყებს
საქართველოს პარლამენტის ეროვნული ბიბლიოთეკა კომპანია „გალფთან“ ერთად, ხვალიდან ერთობლივ პროექტ „წიგნიერს“ იწყებს.
როგორც „ინტერპრესნიუსს“ ეროვნული ბიბლიოთეკიდან აცნობეს, პროექტის ფარგლებში „გალფის“ ბენზინგასამართი სადგურების ქსელში რეგიონების სკოლებისა და ბიბლიოთეკებისთვის წიგნები შეგროვდება. „გალფი“ ასევე საწვავით მოამარაგებს მაღალმთიან სკოლებს, სადაც მოსწავლეებისა და პედაგოგების ტრანსპორტირების პრობლემაა.
მათივე ინფორმაციით, პროექტი მასშტაბური იქნება და მასში ჩართვა (წიგნების ბენზინგასამართ სადგურებში მიტანა) შეეძლება ყველა მსურველს.
„პროექტის მიზანია რეგიონებში წიგნიერების ამაღლება, რისთვისაც აუცილებელია ბიბლიოთეკების განვითარება, მათი წიგნადი ფონდების განახლება და სკოლების უახლესი ლიტერატურით მომარაგებ’, - ნათქვამია ინფორმაციაში.
ხვალვე ეროვნული ბიბლიოთეკის საგამოფენო დარბაზში „წიგნიერის“ პრეზენტაცია გაიმართება, სადაც მოწვეულ სტუმრებს პროექტის შესახებ დეტალურ ინფორმაციას მიაწვდიან.
„ღონისძიებაზე დასწრების მსურველებმა ეროვნული ბიბლიოთეკის მესამე კორპუსში (გუდიაშვილის 7) უნდა მოიტანონ სულ ცოტა ერთი წიგნი მაინც. წიგნები შეგროვდება წალკის რაიონის ბიბლიოთეკებისთვის. პირველი სკოლა, რომელიც საწვავით მომარაგდება, ფშავში, სოფელ გუდრუხის სკოლა იქნება. ეროვნული ბიბლიოთეკა ყოველთვიურად უზრუნველყოფს შეგროვებული წიგნების ჩატანას რეგიონების სკოლებსა და ბიბლიოთეკებში“, - ნათქვამია ინფორმაციაში.
ამასთან, „წიგნიერისთვის“ „გალფმა“ დაიწყო ვებპლატფორმაზე მუშაობაც, რომლის მეშვეობითაც მაღალმთიან სკოლებს შესაძლებლობა ექნებათ საჭიროებისამებრ საწვავი მარტივად მოითხოვონ.
