მესტიაში მოკლული საკრებულოს წევრის ლომარ ნიგურიანის საქმეზე ზუგდიდის საქალაქო სასამართლოში წინასასამართლო სხდომა გაიმართა. სხდომას ბრალდებული არ ესწრებოდა.

ბრალდებულ მამუკა ნიგურიანის სახაზინიო ადვოკატის, როზეტა ზარქუას თქმით, ბრალდების მხარის მიერ წარმოდგენილი საქმის მასალები ბრალის დასამტკიცებლად საკმარისი არ არის. როგორც ზარქუამ სასამართლოზე აღნიშნა, მისი დაცვის ქვეშ მყოფი უდანაშაულოა და მას სასამართლოს ობიექტური გადაწყვეტილების იმედი აქვს.

საქმის პროკურორის ლევან ფიფიას თქმით კი, ნიგურიანის ბრალეულობაზე არაერთი მტკიცებულება მიუთითებს.

შესავალი სიტყვის წარმოთქმამდე ბრალდებულის ადვოკატმა აღნიშნა, რომ მას ნიგურიანთან კავშირი არ აქვს, თუმცა მიიჩნევს, რომ ბრალდებულს სხდომაზე არ გამოცხადების საპატიო მიზეზი ექნება.

შემდეგი სასამართლო სხდომა, რომელზეც ბრალდების მხარე რამოდენიმე მოწმის გამოკითხვას გეგმავს, 27 აპრილს გაიმართება.

2017 წლის 25 დეკემბერს მესტიის საკრებულოს წევრი “ერთიანი ნაციონალური მოძრაობიდან“ ლომარ ნიგურიანი ცეცხლსასროლი იარაღით საკუთარ ეზოში მოკლეს. საქართველოს შინაგან საქმეთა სამინისტროში აღნიშნულ საქმესთან დაკავშირებით გამოძიება ორი მუხლით - 108-ე და 236-ე მუხლებით მიმდინარეობს. აღნიშნულ საქმეზე ბრალდებული მამუკა ნიგურიანის ამ დრომდე იძებნება.