სასკოლო სპორტული ოლიმპიადები ეროვნულ დონეზე ჩატარდება, - ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის სხდომაზე განაცხადა.
პრემიერის თქმით, ამ გადაწყვეტილების მთავარი მიზანია, ჯანსაღი ცხოვრების წესის პოპულარიზაცია.
გიორგი კვირიკაშვილის თქმით, ძალიან მნიშვნელოვანია, რომ მოზარდებმა ერთმანეთი გაიცნონ სპორტში და არა ქუჩაში.
„სასკოლო სპორტულ ოლიმპიადებთან დაკავშირებით არის ახალი, ძალიან მნიშვნელოვანი ინიციატივა. საქართველოს განათლებისა და მეცნიერების სამინისტრო სასკოლო სპორტულ ოლიმპიადას ეროვნულ დონეზე ჩაატარებს. გადაწყვეტილების მთავარი მიზანი მოზარდებში ჯანსაღი ცხოვრების წესის პოპულარიზაცია და ამ წესის დამკვიდრების ხელშეწყობა გახლავთ. სასკოლო სპორტული ოლიმპიადის საწყის ეტაპზე ჩართვა სპორტული მონაცემების მიუხედავად, ყველა მოსწავლეს შეეძლება. ამ პროგრამის ბიუჯეტი თითქმის ორმაგდება და 1700-ზე მეტი საჯარო და კერძო სკოლების 100 000-ზე მეტი მოსწავლე მიიღებს ამაში მონაწილეობას. საუბარია, 8 000-ზე მეტი სპორტული შეჯიბრების ჩატარებაზე. ძალიან მნიშვნელოვანია, რომ ჩვენმა მოზარდებმა ერთმანეთი გაიცნონ სპორტში და არა ქუჩაში. ამიტომ, მე მივესალმები ამ ძალიან კარგ ინიციატივას“, - განაცხადა გიორგი კვირიკაშვილმა.